కాంగ్రెస్ కి 'ఓ మంచి షాక్' ఇచ్చిన రంగా వారసుడు

రాష్ట్రం ఎలాఉన్నా విజయవాడలో మాత్రం రాజకీయం బాగా వేడెక్కుతుంది. కాంగ్రెస్ పార్టీకి విజయవాడ పెద్దగా అచ్చి వస్తున్నట్లులేదు. కొద్ది వారాల క్రితం కాంగ్రెస్ పార్టీకి ఒకప్పుడు విజయవాడలో దిగ్గజం లాంటి నాయకుడు అయిన పర్వతనేని ఉపేంద్ర ప్రజారాజ్యం లో చేరి షాక్ ఇస్తే నిన్నటి వార్త ఒకవిధంగా కోలుకోలేని దెబ్బ అని చెప్పవచ్చు.

వంగవీటి మోహనరంగా కుమారుడు, ప్రస్తుత కాంగ్రెస్ ఎమ్మెల్యే అయిన వంగవీటి రాధాకృష్ణ ప్రజారాజ్యం గూటిలోకి చేరాడు. ఇది నా దృష్టిలో కాంగ్రెస్ కి ఒక మంచి షాక్. అతని గెలుపు నులుగేళ్ళ క్రితం కాంగ్రెస్ లో ఒక వర్గానికి మానసిక బలాన్నిచ్చిందనుకుంటే ఇవ్వాళ అతని ఫిరాయింపు ఒక విధంగా కాంగ్రెస్ లో ఆ వర్గం నుండి ఓటుబ్యాంకు లేకుండాపోయింది అని చెప్పొచ్చు. కనీసం విజయవాడ నగరం వరకు అయినా ఇది తప్పకుండా వర్తిస్తుంది.

తన తండ్రిని చంపిన వారికి ప్రభుత్వం కొమ్ము కాస్తుందని చెప్పి అప్పట్లో రాధా నిరాహారదీక్షకు పూనుకున్నపుడే అతను కాంగ్రెస్ లో సరిగా ఇమడలేకపోతున్నాడనే సంకీతాలు వచ్చాయి.

రాష్ట్రంలో పరిస్థితి ఎలా ఉన్నా విజయవాడ నగరంలో మాత్రం ప్రారపా పెద్ద పార్టీలకు చెమటలు తప్పక పట్టిస్తుంది.
మొదట బోండా వంటి చిన్న నాయకులు.
తరువాత కేశినేని వంటి వ్యాపారవేత్త (ఈయన ఒకప్పుడు తెదేపా సానుభూతిపరులు)
ఆ పై పర్వతనేని వంటి అనుభవజ్ఞుడు(వయస్సు బాగా పైబడిన ఈయన ఎంత వరకు ప్రభావితం చేయగలడో అనేది అనుమానమే).
ఇప్పుడు వంగవీటి వంటి 'ప్రజామోదం ఉన్న పేరు' కలిగిన యువనాయకుడు.

ఈ పరిణామం నుండి కాంగ్రెస్ ఎలా తెరుకుంటుందో చూడాలి. ఈ కొత్త మార్పువలన ప్రజారాజ్యం పార్టీ కృష్ణ జిల్లాలో ఇంకొంచెం బలపడే అవకాశాలు కనిపిస్తున్నాయి.