మాయావతి: అవినీతికి హుందాతనం తెచ్చిన దేవత

రాజకీయాలలో అడుగుపెట్టి దొంగతనంగా సంపాదించిన సొమ్ముని దాయడానికి నానా కష్టాలు పడే ఈ కాలపు నాయకులు మాయావతిని చూసి ఎంతో కొంత నేర్చుకోవాల్సిందే.

బడుగు బలహీన వర్గాల ప్రజలను ఉద్ధరిస్తానని చెప్పి అందలం ఎక్కిన ఆమె, ప్రజల నుండి, పార్టీ కార్యకర్తల నుండి డబ్బులు పోగు చేసే తీరు అసమానం. తలమానికం కూడా. భారి స్థాయిలో ఒక బహిరంగ సభను ఏర్పాటు చేసి తనను చూడడానికి పనులు మానుకుని వచ్చిన అమాయక ప్రజలను తన పుట్టిన రోజు కోసం డబ్బులు పబ్లిక్ గా అడుక్కోవడం ఆమెకే సాటి.

అంతే కాదు తనకు ఎవరూ లేరు అంటూ, తను పెళ్లి చేసుకోకుండా ఉన్నది ప్రజలకోసమేనని ఒక పక్క చెపుతూ జనం దగ్గర అడుక్కున్న డబ్బుతో తన స్వంత గ్రామంలో ఇంద్ర భవనం లాంటి ఇల్లు కట్టుకుంది. నాలుగేళ్ళలో తన స్థిరాస్తి దాదాపు పదింతలు అయినట్లు అఫిడవిట్ లో చూపించింది. కారణం అడిగితే పార్టీ వాళ్ళు తన మీద ప్రేమతో ఢిల్లీలో తనకు ఒక ఇల్లు కొనిపెట్టారని చెప్పుకుంది.

ఇప్పుడు లేటెస్ట్ గా ఆమె పుట్టిన రోజు వేడుకల కోసం పార్టీ నాయకులు ఎవరెవరు ఎంత సమకూర్చాలో టార్గెట్లు పెట్టిందట. ఆమె పెట్టడంతో ఆ దేవత గారి భక్తులంతా ఊరి మీద పడి జనాన్ని కొట్టి మరీ మామూళ్ళు వసూళ్లు చేస్తున్న క్రమంలో ఒక ఇంజనీరు ప్రాణాలు కోల్పోయాడు. కొట్టి చంపింది ఎవరో కిరాయి గూండా కాదు. సాక్షాత్తు ఆ పార్టీ ఎమ్మెల్యే.

ఇది చాలదా ఆమె బడుగు బలహీన వర్గాలకోసం ఎంత కష్టపడుతుందో తెలుసుకోవడానికి ! ఇవన్నీ ఒక ఎత్తు ఐతే కాన్షీరాం పేరిట కట్టిన పార్కుకి కోట్లు ఖర్చుపెట్టి డజన్ల కొద్దీ ఇత్తడి ఏనుగులు తరలించి నలువైపులా పెట్టింది. విడ్డూరం ఏమిటంటే ఆమె అధికారం చేపట్టిన వెంటనే ప్రధాన మంత్రిని రాష్ట్రాభివృద్ధి కోసం ఎనభై వేల కోట్ల రూపాయలు మంజూరు చేయమని అడిగింది. ఇంకా నయ్యం. ఇవ్వలేదు. ఇస్తే వాటితో ఏమి చేపించేదో.